ASSEBLIEF - MOENIE NET HIER KOM AFKLIM NIE!!

Ek weet nie hoeveel kere ek dit moet beklemtoon nie, maar ek sê weer: MOET ASSEBLIEF NIE NET 'N VLIEGKAARTJIE IN SA KOOP EN HIER KOM AFKLIM NIE!!

Dit kan die slegste besluit van jou lewe wees. Doen jou huiswerk BEHOORLIK! Jy kan jou hele toekoms opmors deur dit nie te doen nie. Wag eerder 'n bietjie langer en spandeer 'n paar Rand op 'n LSD-toer en doen jou navorsing behoorlik voordat jy kom.

Ek besef terdeë dat die situasie in SA amper ondraaglik raak, maar die oplossing is nie om alles in SA op te gee om net weer uit NZ gedeporteer te word nie! Maak doodseker jy kan hier 'n werk kry en die BELAGRIKSTE van alles, maak doodseker jy sal kwalifiseer om Permanent hier te bly!

Ek WEET familie en vriende hier in NZ sê vir jou jy moet maar net kom, jy SAL 'n werk kry en met 'n werk sal jy die reg hê om permanent hier te bly. Laat ek nou vir jou sê dis 'n STRONT STORIE!!

Ek hoor daardie storie ELKE WEEK as mense vir my skryf wie hier in NZ aangekom het, nie werk of PR kan kry nie en nou in 'n ernstige penarie sit. Die einste familie en vriende wie hulle met hulle onverantwoordelike beloftes hierheen gelok het staan dan uit die water uit en haal net hulle skouertjies op! Dan is jy net 'n oorlas vir daardie familie en vriende en dink hulle nie aan die stront storietjies waarmee hulle jou hierheen gelok het nie!

DIT IS BAIE KERE NIE SO MAKLIK OM 'N WERK IN NZ TE KRY AS WAT ALMAL JOU VERTEL NIE!! BEREI JOUSELF VOOR! NEW ZEALAND STAAN NIE VERNIET ONDER IMMIGRANTE BEKEND AS 'N LAND MET "FAKE JOBS AND FALSE HOPES" NIE. DAAR IS 'N REDE DAARVOOR. DIS WAAR!

PAPIER IS KONING!

Daar is, volgens my, maar net een manier om regtig suksesvol permanent na NZ (of na enige ander land for that matter...) te immigreer en dit is om die immigrasierëels te KEN voordat jy in SA op 'n vliegtuig klim en om dan daardie immigrasierëels te VOLG - EN as jy dit nie ken nie - VRA of gebruik 'n goeie immigrasieagent wat dit ken!!! Onder die "Skilled migrant category" word daar in 99% van die gevalle vereis dat jy 'n formele kwalifikasie van een of ander aard sal hê wat gelykstaande is aan, of beter is as die kwalifikasie wat jy in NZ moet hê vir daardie bepaalde werk.

Mense met ervaring en geen kwalifikasies kan deesdae vir hulle gebrek aan kwalifikasies opmaak deur die regte ervaring te hê soos omskryf in die "Australian and New Zealand Standard Classification of Occupations (ANZSCO)". In sommige gevalle kan ervaring die kwalifikasies wat vereis word vervang. Waar jy staat maak op jou ervaring om kwalifikasies te vervang maak asseblief DOODSEKER dat jy VOLLEDIGE diensrekords het van al die jare waarvoor jy ervaring eis en dat jou diensrekords 'n breedvoerige beskrywing gee van jou pligte en vaardighede.

Dit is ook nie 'n uitgemaakte saak dat jou ervaring wel aanvaar gaan word as voldoende om die vereisde kwalifikasies te vervang nie en dit is altyd 'n waagstuk om net op jou ervaring staat te maak.

Enigiemand wat bereid is om hard te werk staan 'n goeie kans om in NZ werk te kry en 'n werkspermit vir 'n jaar of twee, MAAR weereens as daai werkspermit sy vervaldatum bereik sal jy MOET aansoek doen vir PR (permanente verblyfreg) en SAL daar van jou verwag word om die vereisde kwalifikasies voor te lê of om te bewys dat jy die regte ervaring het om daardie kwalifikasies te vervang. Hulle gaan NIE net jou woord aanvaar dat jy die regte ervaring het nie, jy sal dit moet BEWYS. PAPIER is KONING. Kry hom!

KWALIFIKASIES

Om verstaanbare redes dring NZ daarop aan om kwalifikasies te evalueer om die waarde daarvan te bepaal en die meeste Universiteite in SA se kwalifikasies word deur die Immigrasie-departement aanvaar, MAAR nie altyd deur die verskillende bedrywe nie. Oorsese kwalifikasies moet deur die NZQA (New Zealand Qualifications Authority) ge-evalueer word om te bepaal of dit op dieselfde vlak as soortgelyke kwalifikasies in NZ is. NZQA evaluasie MOET deesdae saam met jou Permanente Verblyf-aansoek ingedien word (Kyk egter eers by die lys van Erkende Kwalifikasies of NZQA evaluasie nodig is vir jou kwalifikasie).

Kwalifikasies waarvan ons die waarde in SA aanneem en as vanselfsprekend aanvaar word hier ernstig bevraagteken en soms selfs verwerp. Dit is baie vernederend en kan jou vêr terug sit. Mense wat veral onder hierdie sambok deurloop is vakmanne en ek het kennis van elektrisiëns en loodgieters wat weer al hulle vaktoetse in NZ moes kom skryf het om te kwalifiseer en te registreer.

Daarby moet jy vir 'n magdom beroepe by beroepsliggame registreer voordat jy kan aansoek doen om permanente verblyf en werk. KLIEK HIER om vas te stel WIE moet registreer en WAAR en kyk ook sommer na die lys van Erkende Kwalifikasies (Recognised Qualifications) wat deur NZ Immigrasie aanvaar word. Besoek die webwerwe om presies die vereistes vas te stel waaraan jy moet voldoen. Baie van hierdie registrasie prosedures is tydsaam en uitgerek en moet liefs afgehandel word voordat jy dit oorweeg om na NZ te kom.

Baie SAners maak die fout om te dink hulle is so uniek dat NZ sal dink hulle is 'n Godsgawe wat by hulle aan wal gestap het, net om baie wreed ontnugter te word! Moenie die fout maak om te dink daar is nie opgeleide mense in NZ nie. Oor die algemeen werk die Kiwi's hard en het 'n hoë vlak van opvoeding en in sommige gevalle is daar selfs 'n ooraanbod van goed gekwalifiseerde mense. Dit is nie ongewoon om mense met hoë kwalifikasies te sien pos aflewer of in parke werk nie. 'n Werk wat ons in SA miskien as 'n minderwaardige werk sien vereis soms 'n naskoolse kwalifikasie hier.

Tekorte in NZ beteken nie noodwendig dat 'n mens gaan werk kry nie. Daar is altyd 'n tekort aan onderwysers, en tog sukkel SA onderwysers soms vir maande om poste te kry. 'n Gebied waar daar chronies tekorte is en waarin hulle verseker nie genoeg mense kan kry nie is sekere groepe in die gesondheidsdienste soos verpleegsters en radioloë en ingenieurs soos padingenieurs.

VERVALSING VAN KWALIFIKASIES:  SAners is vir baie dinge bekend (meestal goeie dinge), maar ons het ook nou bekend geraak daarvoor dat ons kwalifikasies vervals. Dit het geweldige implikasies vir alle voornemende immigrante. SAners wat na NZ wil immigreer kan verseker wees dat hulle kwalifikasies van nouaf onder 'n vergrootglas gaan deurloop en as jy nou alle hoop op immigrasie oorboord wil gooi moet jy sulke dinge doen. 'n Paar vrot appels het nou weer alles vir die ander bederf!!

WERK IN NEW ZEALAND

HEEL EERSTE : STEL VIR JOU 'N BEHOORLIKE CV OP!!

Ek kan dit nie genoeg beklemtoon nie. As jy enigsins verwag om deur enige werkgewer ernstig opgeneem te word MOET jy vir jou 'n behoorlike CV (Curriculum Vitae) opstel of laat opstel. Dit klink vanselfsprekend, maar ek sien gereeld CV's wat jou sal laat skrik.

Die Kiwi's is in die algemeen professioneel en lewer diens van hoogstaande gehalte. Hulle werksomgewing is baie minder formeel as waaraan ons gewoond is, maar hulle vereis hulle pond vleis in die werksplek en jy moet jou kant bring. Politieke en rassekwessies vorm nie deel van die werksomgewing nie en is 'n welkome verandering vir baie SAners.

Jy gaan jou NIE ryk werk hier nie, maar jy sal genoeg verdien om aan die lewe te kan bly. 'n Groot probleem in NZ is die klein verskil in die uurlikse loon tussen half-geskoolde arbeid en goed gekwalifiseerde mense. In Auckland kan 'n gewone arbeider gemiddeld tussen NZ $12.50c (minimum wage) en NZ $15 per uur verdien terwyl 'n gegradueerde verpleegster met nagraadse kwalifikasies en 15-20 jaar ervaring maar NZ $27 - NZ $33 per uur verdien. NZ is bekend vir sy "Low wage economy" en salarisse is oor die algemeen laag.

Verder is die woord "bonus" vir hulle maar net iets wat in 'n woordeboek staan en maak hulle nie veel daarvan uit nie en van 'n 13de tjek het hulle nog NOOIT van gehoor nie. Die woord "salarisverhoging" het omtrent die status van 'n vloekwoord en word nie sommer in goeie geselskap gebruik nie, veral nie in jou baas se teenwoordigheid nie!

Gemiddelde salarisverhogings (met baie moeite) beloop so in die omgewing van 1% tot 3% per jaar. In alle regverdigheid moet ek darem byvoeg dat inflasie baie laag is (tussen 1 en 3% per jaar) en dat groot salarisverhogings nie nodig is nie.

Bevorderingsgeleenthede is skaars en daar moet gewoonlik iemand bedank, aftree of dood gaan voordat 'n bevorderingsgeleentheid ontstaan (amper soos in die ou SA Staatsdiens!).

80% van die bevolking verdien minder as NZ $99 000 pj. en die gemiddelde Bruto (voor belasting) inkomste van 'n Kiwi-gesin is in die omgewing van NZ$78 000 jaar.(Bron: Statistics New Zealand)

NB: "SKILLS SHORTAGE LISTS"

Die feit dat jou beroep op een van die "Skills Shortage Lists" is is GEEN waarborg dat jy gaan werk kry nie. Op hulle beste is die "Skills Shortage Lists" minstens 6 maande agter by die arbeidsmark se werklike behoefte en hou glad nie tred met wat werklik aangaan nie. Moet jou ASSEBLIEF nie verlaat op die "Skills Shortage Lists" nie!! Ek wens hulle wil dit eerder die "Imagined Skills Shortage Lists" noem, want baie immigrante kom hier aan en vind dat die "Skills" wat so in tekort is glad nie vir hulle werk kan kry nie..

Beloftes word nie altyd nagekom nie - Wees ook bedag daarop dat die Kiwi's maklik beloftes maak en nie altyd so flink is om dit na te kom nie. Dis amper 'n algemene ding dat daar beloftes aan werksoekers (veral die wat dit telefonies uit SA doen) gemaak word om hulle hier te kry en as hulle hier kom dan hoor jy nie weer van daai beloftes nie. As jy NIE 'n belofte op papier kry nie is hy NIE gemaak NIE!

Algemene beloftes wat jy maklik (en baie) sal hoor is beloftes oor behuising en vervoer en die beloftes is BAIE vêr verwyder van dit wat JY dink dit is. 'n Belofte om jou met behuising te help beteken baie keer op sy heel beste maar net om jou aan 'n eiendomsagent voor te stel wat 'n huis aan jou wil verhuur en om jou met vervoer te help beteken maar net om vir jou 'n plek op die "schuttle" bussie van die lughawe af te bespreek en om jou die volgende môre aan sy pêl voor te stel wie tweedehandse karre verkoop!!

Dis skrikwekkend hoeveel e-mails ek kry oor beloftes wat aan immigrante gemaak is tydens werksonderhoude wat nooit nagekom word nie. Dis 'n swart kol op die naam van Kiwi-werkgewers. ONTHOU as dit nie op papier is nie HET jy dit NIE!

SALARISSE IS 'N GEHEIM!  'n Baie eienaardige ding wat jy sal waarneem by werkadvertensies is dat jy SELDE 'n aanduiding van die salaris of salarisskaal sal kry. Dit is sodat hulle die absolute minimum met jou kan beding sonder om hulle vas te maak. Jy sal baie vind dat daar saam met jou ander mense werk met presies dieselfde kwalifikasies en ervaring wat meer as jy verdien, net omdat hulle gelukkig was om 'n höer salaris te beding. Immigrante is gewoonlik so ywerig en verleë om 'n werk te kry dat hulle omtrent enige aanbod sal aanvaar en word so uitgebuit.

Die slag as daar 'n salarisskaal by 'n werksadvertensie is wat bv. sê tussen $80k en $100k kan jy VERSEKER wees die maksimum wat jy gaan kry gaan baie naby aan $80k wees en hulle skroom nie om verskonings te soek om jou minder aan te bied nie.

Ek skilder nou 'n redelike slegte prentjie en seker die "worst scenario" ,maar berei jou maar voor op die dinge wat ek gesê het, want dan kan jy dalk net aangenaam verras word.

"KIWI EXPERIENCE": Alle immigrante wie nog ooit in NZ werk gesoek het ken hierdie twee woorde!! Dis gewoonlik die twee woorde wat gebruik word as rede hoekom jy nie 'n werk gekry het nie of hoekom jy nie meer geld aangebied is tydens jou onderhoud nie. Dis so 'n lekker Kiwi "cop out" as hulle nie in jou gesig vir jou wil sê dat hulle nie immigrante wil aanstel nie.

LEES  HIER OM UIT TE VIND HOE OM WERK TE VIND IN NZ AS JY NIE PERMANENT HIER BLY NIE.

Die artikel is 'n uittreksel uit die webwerf van IMMagine New Zealand Immigration Consultants (voorheen Protea Pacific Ltd.) en dis die beste uiteensetting wat ek nog op enige webwerf gevind het.

NB: Jy MOET hierdie artikel lees! KLIEK HIER  (How do I get a job in New Zealand if I’m not a resident?)

Immigrante se verwagtinge soms onrealisties:

SAners verwag oor die algemeen om op dieselfde vlak van hulle beroep (as waarop hulle in SA was) te begin as hulle hier aanland en word feitlik deur die bank terleurgestel. Gewoonlik moet hulle spook om net eers ‘n werk te kry (wat ‘n nagmerrie op sy eie is), laat staan nog op dieselfde vlak as in SA. Min praat en hard werk is beslis die sleutel, veral in die begin.

Die ekonomie is klein en bestaan grotendeels uit ‘n klomp klein maatskappye, so daar is geen plek vir “free rides” of wegkruipplek vir kansvatters nie - soos wat dit in die verlede in SA moontlik was in die groot korporasies. Aan die ander kant weet die Kiwi’s ook dat die SAners hardwerkend en intelligent is en dit gee jou soms ‘n voorsprong, maar daar sal definitief van jou verwag word om jou kant te bring en jouself te bewys.

Kiwi's het min respek vir titels en range en ek sien heelwat CV's in 'n maand wat baie titels bevat en min onderhoude kry! Nie eens die Eerste Minister kry baie respek op grond van sy/haar titel nie en vir die Kiwi's gaan dit alles oor net een ding - KAN JY DIE WERK DOEN??! Finish en klaar!

As jy ernstig is om permanent in NZ te bly sal jy net MOET bereid wees om 'n "Indian" te wees, want hier is klaar OORGENOEG "chiefs" en NZ soek beslis "Indians" en nie "chiefs" nie. As jy graag 'n "CHIEF" wil wees moet jy miskien 'n ander land oorweeg.

SPESIALE WOORD AAN VERPLEEGSTERS

Verpleegsters is van die min mense wat hier kan afklim en binne 'n paar dae 'n werk kan hê, MITS jy natuurlik voor die tyd by die NZ Verpleegraad (http://www.nursingcouncil.org.nz/) geregistreer het en jou " practising certificate" het.

NB: Wees asseblief daarop voorbereid dat die NZ Verpleegstersraad van SA verpleegsters verwag om die Akademiese IELTS toets of die Australiese Occupational English Test (OET) aflê voordat hulle kan aansoek doen om registrasie. Vir meer besonderhede gaan kyk asseblief op die NZ Verpleegstersraad se webwerf - http://www.nursingcouncil.org.nz/

IS DAAR 'N "SLEGTE" TYD OM WERK TE PROBEER SOEK IN NZ?

BESLIS, JA!

Begin November (amper Middel Oktober sal ek sê) tot amper einde Januarie is 'n BAIE slegte tyd om in NZ aan te kom en 'n nuwe werk te begin of om te begin werk soek. Die land gaan amper in hibernasie en dinge gebeur baie stadig (veral by NZ immigrasie en ander Staatsdepartemente) ,vlugte is vol, akkommodasie is duur en moeilik om te kry. Ek wil so vêr gaan om te sê as jy nie voor die 1ste Oktober kan kom nie, moet jy die eers oorweeg om in die laaste week van Januarie te kom.
 
Nog een groot rede hoekom ek Desember glad nie sal aanbeveel nie is dat die meeste besighede vir minstens 'n week tot selfs 2 weke toe maak oor Krismis en Nuwejaar en dat personeel basies verplig word om verlof te vat oor daardie tydperk (soos die hospitaalgroep waarvoor my vrou werk) en as jy 'n nuwe werknemer is wat nog nie genoeg verlof opgebou het om jou verlof te dek oor daardie tydperk nie gaan jy nie 'n inkomste hê vir daardie typerk nie en gaan dit neerkom op onbetaalde verlof.

"TYRE-KICKERS" , "REVOLVING DOOR EMPLOYEES" en probleme vir ernstige werksoekers

Die "TYRE-KICKER" is iemand wat aansoek vir 'n pos gedoen het ,die pos gekry het en daarna met een of ander lam verskoning nie opdaag om die pos te vul nie. Dit gebeur so gereeld dat dit oneindige probleme veroorsaak vir ander ernstige werksoekers, personeelkonsultante en werwingsagente.

As gevolg van "tyre-kickers" wil die oorgrote meerderheid van werkgewers nie meer onderhoude toestaan aan applikante wie nie reeds in NZ is nie of glad nie immigrante in diens wil neem nie. As gevolg van "tyre-kickers" gaan baie geleenthede vir immigrante verlore wie ernstig is om 'n werk in New Zealand te kry. "Tyre-kickers" veroorsaak ook dat personeelkonsultante / werwingsagente en werkgewers groot bedrae geld verloor as gevolg van verlore tyd, verlore komissie, heradvertering van poste, hou van nuwe onderhoude, ens, ens.

'n Pos is beskikbaar vir 'n applikant vir die eenvoudige rede dat daar NOU 'n behoefte bestaan daarvoor en dat die pos so gou as moontlik gevul moet word. Gevolglik moet die applikant besef dat indien hy die werk sou kry daar van hom/haar verwag gaan word om so gou as moontlik te begin werk. Werkgewers is nie ongevoelig vir die behoeftes van immigrante nie, hulle weet immigrante het gewoonlik nog 'n paar sakies om af te handel en is gewoonlik bereid om tot 3 weke, miskien 'n maand, te wag vir die immigrant om te begin werk. Daarom is dit UITERS belangrik dat jy reeds 'n plan van aksie in plek sal hê van wat jy gaan doen as jy 'n werk hier bekom het.

Moenie eers 'n werk kom kry en DAN eers dink wat jy gaan doen nie! Jy gaan dit berou!

Ons hoor daagliks voornemende immigrante sê dat hulle nie hulle werk en lewe in SA kan opgee voordat hulle nie doodseker is dat hulle dit in NZ gaan maak nie en daarom eers 'n werk wil kry voordat hulle in SA bedank, die huis verkoop, ens. Dit is 'n geldige argument en omdat ons dieselfde paadjie geloop het verstaan ons dit, maar met goeie vooraf beplanning kan jy die vir jouself maklik maak en jou immigrasie baie glad laat verloop.

ONTHOU net met immigrasie gaan jy NOOIT, maar net NOOIT, 'n 100% waarborg kry dat alles gaan uitwerk nie en as jy daarvoor wag kan jy maar netsowel noual jou immigrasieplanne opgee. Iewers sal jy 'n "leap of faith" moet vat en met goeie beplanning behoort daardie "leap" nie te groot te wees om veilig oor te kom nie. BEPLAN net en doen jou HUISWERK deeglik!

As jy enigsins twyfel of New Zealand die immigrasiebestemming vir jou is, belê (ek glo dis 'n belegging) in 'n LSD-toer en KOM KYK eers en praat met immigrante wie lank reeds hier gevestig is. Of jy nou op een van ons LSD-toere kom of jou eie een aanpak kom kyk eers en verwyder alle twyfel voordat jy die groot sprong vat. As jy dan besluit om nie te kom nie, was dit nou ook nie 'n verlies nie, dan het jy ten minste 'n lekker vakansie gehad in 'n baie mooi land!

Die "Kangaroo", "Hopper" (soms die "Jack in a Box"" genoem) of "Butterfly" is iemand wat van die een werkgewer na die ander spring agter salaris aan of 'n bietjie beter werksomstandighede. Hierdie beskrywings het ek al baie gehoor as daar na CV's gekyk word en hoewel "job-hopping" deesdae as 'n baie goeie moderne manier gesien word om vinnig opgang te maak in die arbeidsmark is dit iets wat jou in NZ se klein arbeidsmark vinniger kan inhaal as wat jy dink.

'n Mens kan miskien in 'n groot arbeidsmark soos in die VSA en selfs Ozzie daarmee wegkom, maar in NZ kan dit jou sleg inhaal en jou in die gat byt. Ons vind dat werkgewers al minder kans sien om immigrante wie werk soek te aanvaar ,omdat dit vry algemeen gesê word dat SAners "revolving door employees" is en hulle wag net dat hulle 'n voet in die deur kry met 'n werksaanbod en werksvisa het en dan kry hulle vir hulle ander werk. Hulle sê openlik ons gebruik hulle net om in te kom en is nie ernstige werksoekers nie.

'n Werkgewer wie al die moeite gedoen het om deur die "red tape" en probleme te gaan waardeur die NZ Immigrasiedepartement hulle sit om vir 'n immigrant 'n werk te gee en daarna deur die immigrant soos 'n warm patat gelos word laat 'n baie nare smaak in die Kiwi werkgewer se mond en laat hom volgende keer twee keer dink voordat hy 'n immigrant 'n werk aanbied. So maak ons die deure toe vir ander immigrante wie na ons kom.

Niemand sê enigiemand moet vir 'n vark van 'n baas werk wie jou soos 'n hond behandel nie en as dit met jou gebeur en jy onmenslik behandel word, moet jy BESLIS vir jou 'n ander werk soek en sal niemand jou blameer nie, maar dink voor jy sommer net "hop" oorlat dit vir jou lekker lyk!!

HOEVEEL MOET JY VERDIEN OM TE KAN OORLEEF IN NEW ZEALAND?

1. Op die platteland gaan jy 'n gesin van 4 mense NET NET kan onderhou as jy $24 per uur verdien (ongeveer NZ $50 000 per jaar). Dit is nou as jy ABSOLUUT GEEN skuld het nie en KONTANT kan lewe. Jy gaan dan ook op die broodlyn lewe en NET die basiese dinge kan bekostig. $24 per uur gaan jou $730 per week in jou hand gee (na belasting). Trek daarvan af (per week) $350 tot $400 vir huishuur, $80 vir telefoon en elektrisiteit, $100 vir transport/petrol, $200 vir kos klere en toiletware (as jy BAIE gelukkig is). Net hierdie basiese dinge werk uit op $730 tot $780 per week en laat jou met NIKS oor nie. Dan het niks onvoorsiens gebeur soos siekte of skooluitstappies of sport nie! Met $16 per uur kry jy $512 in jou hand - doen maar self die somme! 'n Mens kan altyd sê jy sal jou inkomste aanvul deur ekstra werk en jou vrou te laat werk, maar dis nie so maklik nie en dit gaan dalk MAANDE vat voordat jou vrou (wettig) mag werk.

2. 'n Outjie wat so min of meer kan lees en skryf en die "STOP/GO" teken by die padwerke ronddraai kry $13 per uur.

Minimum loon:http://www.ers.dol.govt.nz/pay/minimum.html

BAIE BELANGRIK: As jy na 30 November 2009 op 'n werkspermit na NZ kom en jou salaris is MINDER as NZ $33,675 per jaar (ongeveer $16.20c/uur) kan jou kinders NIE verniet skooltoe gaan nie en word hulle as "International Students" behandel en sal dit jou tussen $10 000 en $15 000 per kind per jaar kos om hulle hier te laat skoolgaan.(Bron)

 
3. Hoeveel belasting trek hulle af van jou Salaris? Jy kan die nuutste belastingkoers en formules om jou belasting uit te werk HIER kry.

Kortliks werk die persoonlike belasting so:

Vir die bedrag $0.00 tot $14 000 trek jy 14.5% belasting af (Sluit die ACC-heffing in)
Vir die bedrag $14 001 tot $48 000 trek jy 23.0% belasting af (Sluit die ACC-heffing in).
Vir die bedrag tussen $48 001 en $70 000 trek jy 35.0% belasting af (Sluit ACC-heffing in).
Vir die bedrag wat jy oor $70 001 verdien trek jy 40.0% belasting af (Sluit ACC-heffing in).

VOORBEELD:

As Mnr. B. Sakkie 'n inkomste van $80 000 per jaar het word sy persoonlike inkomstebelasting as volg bereken:

VAT-BELASTING: (Value added Tax - voorheen GST)

Die koers vir VAT in NZ is op die oomblik 12.5%, maar gaan binnekort na 15% opgeskuif word.

LEWENSKOSTE-PRYSLYS: Ek hou 'n lewenskoste-pryslys by wat ek twee keer per jaar opdateer en wat jy deur my "Kontak my" blad kan aanvra. Die lewenskoste pryslys wat die pryse van meer as 300 verbruiksartikels het sal dit vir jou aansienlik makliker maak om 'n maandelikse begroting uit te werk.

NB: WERKSPERMITHOUERS WAT VAN WERK VERANDER

BAIE BAIE BELANGRIK: As jy in New Zealand is op 'n werkspermit en jy verander van werkgewer MOET jy die immigrasiedepartement DADELIK in kennis stel van jou verandering van werk. Hulle sal dan jou werkspermit se voorwaardes so verander. As jy van werk verander en jy stel Immigrasie NIE in kennis nie is jy ONWETTIG in die land en kan jy gedeporteer word!!! As jy gedeporteer word is jou kanse NUL om permanent hier te bly!

Jou werkspermit magtig jou net om vir 'n SPESIFIEKE besigheid/persoon op 'n SPESIFIEKE plek te werk en is nie 'n ALGEMENE magtiging om in New Zealand te werk nie.

WERKLOOSHEID IN NZ

Die amptelike werkloosheid syfer staan hier tussen 4% en 6% per jaar. Vir die presiese werkloosheidsyfer besoek asseblief die webwerf van die Dept. van Arbeid.

Die realiteit is dat daar dosyne hoogs gekwalifiseerde mense is wat werkloos is. Dit is net op melkplase waar jy nog met twee gesonde arms en bene en ervaring ‘n werk kan kry. Baie SAners werk baie hard op melkplase en maak ‘n reuse sukses daarvan, maar hulle sal jou ook kan vertel dat 12 tot 16 uur (en selfs langer) werksdae die reël eerder as die uitsondering is en dat uitbuiting van werknemers ook voorkom.

New Zealand het ook sy "Brain Drain" as gevolg van lae salarisse en hoë studenteskuld en verloor jaarliks amper net soveel mense aan die buiteland as wat hierheen immigreer en soms selfs meer. Besoek gerus die NZ Herald om die nuutste artikels oor immigrante en werkloosheid te lees (heelwat nuwe artikels het onlangs verskyn).