My naam is Louwrens van der Merwe en ons gesinnetjie het in Februarie 2000 na NZ geïmmigreer uit SA en het ons eers in Epsom, 'n voorstad van Auckland, tuis gemaak. Ons gesin het toe bestaan uit 4 lede naamlik ek, my vrou (Ina), my dogter Zani (toe 13 jr oud) en ons seun De Wet (toe 10 jr. oud).

My vrou is 'n teatersuster en in Februarie 2001 het sy 'n pos by die Southern Cross privaat hospitaal in Hamilton aanvaar en het ons sak en pak na Cambridge verhuis waar ons vandag nog bly. Cambridge is so ongeveer 22Km vanaf Hamilton en 'n fantastiese plek om kinders in groot te maak. Lekker plattelands, maar naby aan die stede vir gerief.

Ons dogter (Zani) het gegradueer aan die Universiteit van Waikato en is tans 'n onderwysres by die Westlake Grils High School in Takapuna (North Shore, Auckland). Sy het in haar laaste jaar op Uni vir haar 'n Kiwi wederhelfte gevat en is enkele dae na haar laaste eksamen getroud met James Button, wat ons gesin laat aangroei het tot 5 lede!

Ons seun (De Wet) is nou 21jr. oud en tans besig om sy 3de jaar as ingenieurstudent aan die Universiteit van Waikato klaar te maak. Hy het tot so twee mande gelede (Aug 2011) nog by ma en pa gewoon, maar is nou te "Groot" om nog by die huis te bly en het in 'n studentehuis naby die Uni ingetrek. Ons vermoed daar word tans bietjie meer "ge-social" as wat daar geleer word, maar die punte lyk nog nie te sleg nie, so gee hom maar die voordeel van die twyfel!

Ek is betrokke by die IT-bedryf en het ook in 2007 begin met LSD-toere vir voornemende immigrante na NZ.